الوطن انهار
الوطن اسرار
الوطن هيبة علم ثوار
الوطن جدنا التحده الطوب بالمگوار
الوطن لمة نشامه ابحضن الاهوار
الوطن قلعه
الوطن شمعه
الوطن دمعه
الوطن دم الشهيد الما خذل ربعه
الوطن بستانه وصوت العصافير
الوطن رجفة ضلع شايل مناشير
الوطن دعوة محمد والمسيح
الوطن گذلة اكحيله وشابگه الريح
الوطن فرحة العيد ويه المراجيح
الوطن حيرة [سلام] ويه التباريح
الوطن شمس الظهر
الوطن چاي العصر
الوطن سلة رطب مايع
الوطن چلمات ابو گاطع
الوطن [جعفر]
الوطن نرگيلة [ مظفر ]
الوطن بصرة شناشيل
الوطن طور الاغاني والمواويل
الوطن هور الچبايش والخضيري
الوطن ونة احضيري
الوطن داخل حسن وي بحة الصوت
الوطن همة [ صباح ] الخوف الموت
الوطن صوت المناير
الوطن موال زاير
الوطن دمعة [ عزيز ] وخلگ درويش
الوطن طيبة اهلنه
الوطن هيبة نخلنه
الوطن جوع الحصيري وغربة السياب
الوطن دلة الگهوه ولمة احباب
الوطن بغداد ...
الوطن ضحكة [ رياض ] ابگهوة زناد
الوطن لعب الطفوله والشباب
الوطن همسة عشگ مرسومه عالباب:
الوطن جيران وبيوت وعلاقات وگرايب
الوطن عريس واتزفه الحبايب
الوطن ساكن گلبنه
الوطن سچة دربنه
الوطن [ عبد الكريم ] الاسس النه بيوت
راح ابلا چفن لا گبر لا تابوت
الوطن هوه الحياة
الوطن دجله وفرات
الوطن دمعة فرح باطراف الجفون
الوطن موجود خلي اشما ايگولون
الاسماء التي وردت في القصيده هي :
سلام : الشاعر سلام صادق
جعفر : الشهيد جعفر الجواهري
مظفر : الشاعر مظفر النواب
صباح : الشهيد الشيوعي صباح طارش
عزيز: الشاعر عزيز السماوي
رياض : هو الصديق الشاعر رياض النعماني
مرات القراءة: 3066 - التعليقات: 0
نقوم بارسال نشرة بريدية اخبارية اسبوعية الى بريدكم الالكتروني ،
يسرنا اشتراككم بالنشرة البريدية المنوعة. سوف تطلعون على احدث
المستجدات في الموقع ولن يفوتكم أي شيئ
الوطن دجله وفرات
