هاذه الليل مهما أيطول .. هم ْ يطلع وراه فجر العراقيين ..

مثل كل الشدايد  , هاذي شدّة أتزول :  أصبْروا يالمسيحيين ..

أصبْروا  ياسراج الوطن ,

يالليّ بقى مضوي في كنائسكم قرون أسنين ..

أصبْروا يازهور الأمل  في قلب العراق أبكل وكت مزروعين

ياوجه النهار اليظلّ  يضحك بالأمل

كلما يخيّم ليل أسود عالعراقيين  ..

ياتاريخ أرض الرافدين  الشافت بأزمانها ..الزين والشين ..

ياصوت العراق الليّ بقى أيرتلّ تراتيل  المحبة والمحبيّن ..

أصبْروا على أوغاد الزمان الأسود الجابنّا كلّ المجرمين ..

أصبرْوا  :  ياصبر أيوب ,

ياصبر المسيح أعله الصليب أبوجه كل الظالمين ..

يا أوّل الناس الجعلكم ألله أول مؤمنين وصابرين ..

أصبْروا يالمسيحيين ..

مثل كل الشدايد هاذي شدّة أتزول ..

ونرجع نسمع أصوات الكنائس

وكل تراتيل المحبة في سما أم الربيعين ..

         **          **

ياشوق الحنين أن كان يمّ دجلة وأذا يالغربة مبتعدين ..

يا أحلام كل العاشقين أبنينوى وكلدانها والبابليين ..

يا أحفاد أول من بنوا هذا العراق المبتلي  بالظالمين الكافرين

المدعيّن  الكاذبين السارقين أموال هذا الشعب بسم الدين ..

ياقدّاس كل موتانا الأفذاذ  الكرام ,

أولاد هذا الوطن أبناء العراق الطيبين ..

وياقدّاس  كل الشهداء وكل ّ ضحايانا بحروب المسلمين ..

ومثل ماتصبر الأشجار الخضرا لو جاها الخريف أبريح تشرين

أصبْروا ياربيع أم الربيعين

وصبركم يزرع الموصل ربيعين ..

أصبْروا :  الجنة ألكمْ  مو لللأنذال اليذبحون البشر

بسم الأسلام وبسم دين المسلمين ..

أصبْروا : الجنّة  أِلكمْ مو ألذوله  

اللّي يحكمون الوطن بالظلم بسم الدين ..

والله الجنّة ألكمْ مو الذوله الضيّعوا أحلى وطن

خلوّه رهينة ومستباح بأيد كل المجرمين ..

أصبْرو يالمسيحيين ..

مثل كل الشدايد ..هاذي شدة أتزول

ونرجع نسمع اصوات الكنائس

وكل تراتيل المحبة في سما أم الربيعين ..