مثل لوح الزجاج ابحجر كسروك
وطن مكسور تحت اقدامهم داسوك
لفّوّك بعلم محروٌكً
كلما تنطفي ويملي الرماد أعيونك يحركًوك
داسوا روحك وداسو شعاع الخير
في وجهك النوراني ولاهابوك
حتى الآه ردت اتكًولها يازهوة الأوطان ماخلّوك !
ويلي اعليك ياروح الحياة
وروحي ذلت بيك من ذلّوك
صاحوا بيك فرهود وصرت منهوب
وياذلتّك من اولادك ينهبوك
وياذلتك من اولادك ايصيرون
ويّ الأجنبي يغزوك ويخونوك
يازينة اوطان الدنية ياشيّال ضيم الناس
ويلي هاكثر ضاموك ؟!
ماهابوك ولارحموك ولاحنّوا عليك أولادك الخانوك
تسع أ سنين خلوك ابعذاب وضيم
حتى الموت ملّ منك وماهدّوك
** **
وطن منهوب نهب الريح
للكًاع الخراب ابريحهم نهبوك
وانجوم الزمان انطفت كلها اوياك
صارت ظلمة من طفوّك
صار الليل بعيونك رماد وموت
واكفوف الغدر سووّها لك تابوت
ومن طاحت الغيرة ومابقى ناموس
دفنوها ذبيحة اوياك وماشالوك
تاليها خرابة أيذرّي بيها الموت
هيج انسحبوا وعافوك !!
** **
ويلي اعليك يابيرغ الهيبة العالية بالناس
الناس اللّي ابفخر حبوّك
الناس اللّي بأمل رادوك
بستان المحبّة وجّنة الدنيا
وطن في كل وقت يلكًوك
الناس اللّي صرت بكَلوبهم شريان
وشريان الوطن من ينسّد يفقدوك
الناس اللًي بقوا ويّاك
محرومين , مسجونين
تعبانين , مظلومين , متغربين
لكنهم بقوا ويّاك ماعافوك
موذوله الأنذال اللّي اجوا بالأجنبي يغزوك
ولاذوله الأوغاد اللّي رضوابالذلّ
تحت الأجنبي يحكموك
ولاذوله الصعاليك الأجوا من كل فجاج الأرض
متحزمين بحزام الحرام وكًاموا يسرقوك
ولا ذوله النسوا انكّ وطن ,أغلى وطن
لكن الرخيصة انفوسهم بأرخص ثمن باعوك
ولاذوله اليحسبونك ارض منهوبة
ما ألها شعب من حقهم يقسموك
نسوا انك سليل الأرض لوماتت
تظل انت العراق الحيّ بقلوب اليحبّوك
نسوا انك فجر كل ليل من يفزع
يخلّي الناس تصحى ليومها الموعود
نسوا انك يبو النهرين ياروح الحياة
الكَمت من الموت مرات وترّد اردود
وتشع الدنيا بعيونك شمس متغيب
وشراينك فرات ودجلة يمتدّن
لقلب الأرض .. لقلوب اليحبّوك
** **
ويلي اعليك ياروح الحياة
وروحي ذلّت بيك من ذلّوك
ويلي عليك ياجرح الغميج ابكًلبي
يمتى أتهيد .. يمتى اتهون .. يمتى اتطيب ؟
وين القى الدوا ؟ وياهم اللّي أيداووك ؟
حتى الليّ كنت اتمنى بيهم خير
راحوا عنك وساروا مع الخانوك
** **
ويلي اعليك يانفحة الحبّ ومهجة العشاق
أبكل اوصاف دنيانة الجميلة الشعرا وصفوك
لآنك زينة الدنيا وفرحها وبهجة الأشواق
ولأنك ساكن أكًبال الشمس أهل العلم سكنوك
ومن دارت عليك الدنيا والأنذال ويّ الأجنبي احتلّوك
لمولك أكشاش الدنيا .. كل عيّار كل محتال
كل مرتزق .. كل صعلوك ..
صرت دار الجهل ماتنسكن و اهل العلم هجروك ..
** **
عليمن اعتب وألمن اودّي اعتاب ؟
للباعوك ؟ للخانوك ؟ للعافوك ؟ للحكموك ؟
للسرقوك ؟
ويامكثر انذال البيك ذوله اللّي ابرخص باعوك !ّ
عليمن اعتب والمن اوديّ اعتاب ؟
والدنيا غدت خيسة وعليها االدود يدبي اعليك
يالمقتول . وكل المجرمين القتلة يحيطوك
عليمن اعتب وألمن اودي أعتاب ؟
مرات القراءة: 2258 - التعليقات: 0
نقوم بارسال نشرة بريدية اخبارية اسبوعية الى بريدكم الالكتروني ،
يسرنا اشتراككم بالنشرة البريدية المنوعة. سوف تطلعون على احدث
المستجدات في الموقع ولن يفوتكم أي شيئ
رسالة الى وطني
