ماشالله ابليه حـَـسد

رَدّ (الكاظمي) ، مثل الأسد

افلوس النهـبهه امأمنه

عـفـيه عليه هذا الولـد

ماشالله ابليه حسد

***

هِـوَّه او *(زهيـر) اوشلته

-(صفقة قرن)... حِصَّة شعب

لغـفوهه كلهه ... ياعجب

راح اورجع ! ماكو ذنـِب

ماكـَـفـِتـَه... رايد بعد

ماشالله ابليه حسد

***

خان الصداقة والعهد

دمك (هشام) الما برد

اولاده عيني اتيتمت ..

واهوايه مثله استشهدت

يابو الوعد..وين العهد ؟

ماشالله ابليه حسد

***

توعد اوتخلف شـغـلتك

بالچذب شاطر، محترف

اتمصّ الغضب ! يا خيبتك

مكشوف اصبحت .. ما ينفعك

ارجع ولك ... بسـّـك بعـد

ماشالله ابليه حسد

***

يوم الحساب اوهالگرب ..

ابرجلك اجيت اوهالردت

اشگد اسجنت لمن چنت ؟

لاتنسه ...كلهه امسجله

تـِـفـْلت .. أبد .. لا تعتقـد

ماشالله ابليه حسد

ماشالله

----------------------------------

*سرقة القرن" ـ التي تُعد أكبر عملية سطو ضخمة

حدثت في أكتوبر 2022 والمبالغ الضخمة

التي سُرقت من الأمانات الضريبية

التي كانت محفوظة في وزارة المالية العراقية

من قبل متهمين على رأسهم المدعو (نور زهير)-

بالتعاون مع مسؤولين داخل مكتب رئيس الوزراء

والتي مرت دون عقاب للسراق.

*****************************************************

2 / آذار/2025

ســـــــــــــــــــتوكهولم