فرحت بشكل كبير !! بقدر انزعاجي وأنا أقرأ كتاب دولة رئيس الوزراء ،القاضي بأخلاء مقر جريدة (طريق الشعب) خلال 24 ساعة،وسبب فرحي هو سرعة المصادقة على القرار،فقد تمت المصادقة عليه من قبل ثلاث جهات رسمية بنفس اليوم،وهذا حقا مبعث تفاؤل كبير ،حيث أن جميع معاملات المواطنين سوف تنجز بهذه السرعة،ويبدو أن صبر أبو حسين قد نفذ فعلق قائلا
- ما تكَلي شنهي انته؟؟كَضيتهه عليه فرحي وتفاؤلي..فرحي وتفاؤلي؟؟ دغرالي شنهو بالكتاب حته أفرح وياك..
وانصياعا لطلبه قرأت له ما يلي :
( إلـــــــــــــى / جريدة طريق الشعب
الموضوع /أخلاء بناية
بناء على رسالة مكتب القائد العام للقوات المسلحة 183 في 5/3/2011
ورسالة أمـــــــــين الســــــــر العام 156 في 5/3/2011
ورسالة قيادة عمليــات بغداد 443 فــــي 5/3/2001
نسب السيد القائد العام للقوات المسلحة دولة رئيس الوزراء تخلى البناية المشغولة من قبلكم خلال (24) ساعة )
- والله حكك يا أبو كَاطع لو تفرح !! كل هاي الدواير وقعت الكتاب بيوم واحد؟؟ يارحمتك يا الله...واتكَلون أكو بيروغراطية وفساد !!
رغبت أن أوضح له من أن هذه الدوائر لم توقع الكتاب فقط ،وإنما هي أصدرت رسائلها ،ولكنه قاطعني مواصلا حديثه
- جا شو بيان ولادة أبن حسين اتلث تشهر يا الله طلع ...ولو ما داهنين زردوم جم واحد جا ما حصلناه! بس ايبن الجماعة هواي مستعجلين عله (الأخلاء) ....بلا بوش أخلاء
ولم تخيب فراستي وأنا أنظر إلى وجه أبو حسين ،حين قدرت أنه يبحث في ذاكرته عن (سالفة) تنسجم مع ما حدث،إذ أنه قال بعد أن مسح شفته السفلى بسبابته وإبهامه.
ذيج السنة،رحت طارش لكَرايبي،صادفني على كَنطرة((أم سناسل)عبيد المروح،نشدته على خير،وين رايح؟؟كَال رايح للسوالم.كَتله خوش سفره..نكَضي الدرب سوا...آنه هم رايح للسوالم.
ما أطولهه عليك...
وصلنا مجان بيه شوك وطحمه وزور..وجان يوكَف عبيد ويكَول:
- آنه بعد ما أمشي وياك.
- ليش خويه؟؟
- صار مشيك ركض.
- ولك كَول غيرهه!مشيتي ما تبدلت،هذيج هيه الأوليه التاليه..
بصراحــــــــــة أبو كَــاطع صار مشيك ركض
