اشبعنه حچي اشبعنه اوعود
بسكم تلعبون
امحسره ولدنه اوليش
بيهم تذبحون
نبچي اونون چم دوب
ماضلن اعيون
بالبطن بسكم بس
بسكم ترِغـّون
بسكم بعد بس..بسكم تچذبون
بسكم بعد بس..بسكم توعدون
***
اسم الله ع الشباب احا
اسم الله (يريهام)-
حرموا عليچ العيش
ذبحوهه الاحلام
گبلچ صبح (تحسين) وابدمه غرگان
يتموا اطفاله اوليش
يا شعب واشلون
عينة شباب اليوم متوسده تابوت
وين العدل چم دوب..اعلينه تضحكون
بسكم بعد بس.. بسكم توعدون
***
ميات الشباب الراح وآلاف المجاريح
مهجومه كومه ابيوت تدفن توابيت
نوبه الكتل طلقات
نوبه خنگ غاز
يمته الخلاص اشلون
دولة عصابات
والقاتل المجهول متهني مرتاح
ماظل غشيم اليوم كافي بعد بس
ليوين الذبح ليوين
بسكم توعدون
***
احزاب السياسه اليوم فرّخت احزاب
نفس الفلم ينعاد مثل اول العام
لا ذمـَّـه لا اخلاق
لا الله يعرفون
واحد اعمامه حاط
والثاني بالقاط
افلوس الشعب بالجيب
بينه يسرقون
للجاره كلهه اتروح بسمك يا هالدين
بسكم بعد بس بينه تذبحون
بسكم بعد بس بينه تظلمون
بسكم بعد بس
بسكم توعدون
-----------------------------------
23/آب/2020
ســــــــــــــتوكهولم
بسكم توعدون
